Recuperando o espíritu da romaría tradicional, o 5 de agosto centos de persoas daranse cita ao pé da capela situada no cumio da serra nunha xornada que combinará gastronomía, música, deporte e folclore.
“Estamos perante un primeiro paso que, aínda que simbólico, debe ser o berce sobre o que construír un proxecto de activación e dinamización para San Mamede”, afirman os alcades reunidos hoxe en Vilar de Barrio.
Coa intención de seguir avanzando en proxectos conxuntos os catro rexedores municipais daranse cita de novo o 1 de setembro, neste caso na casa consistorial de Laza, co fin de redactar un primeiro anteproxecto que sirva de carta de presentación coa que pretenden implicar tamén a outras administracións como a Deputación de Ourense.
En Vilar de Barrio, 15 de xullo de 2023.- A serra de San Mamede é territorial e administrativamente competencia de diferentes administracións locais. Estas por separado non contan con medios materiais nin humanos para poder activar todos os seus recursos e que estes podan así funcionar como motores de desenvolvemento local, razón pola que os concellos de Vilar de Barrio, Maceda, Montederramo e Laza procuran unir esforzos no marco dun convenio asinado polas catro partes para a dinamización socioeconómica do territorio
Como primeiro paso recupérase a tradicional romaría que na década dos 90 congregaba a centos de persoas na contorna da capela que actúa como divisoria dos diferentes concellos. A festa celebrarase o 5 de agosto dende primeira hora da mañá, podendo ascender camiñando a modo ruta de sendeirismo ou nalgunha das lanzadeiras que se poñerán a disposición por parte da organización. Unha vez no alto celebrarase un xantar con música e xogos populares. Toda a recaudación irá destinada ao arranxo do propio templo, moi afectado por anos de abandono e polas adversas condicións meteorolóxicas do lugar onde foi erixido.
Para participar e reservar praza nas diferentes actividades e o propio xantar as persoas interesadas poden poñerse en contacto co concello de Vilar de Barrio no teléfono 988449001.
