Carballo foi un clérigo, historiador e mestre que naceu na pequena aldea de Celeirón, en 1925, e morreu en Salamanca, en 2014. A súa historia comeza cando en 1941 trasládase a Madrid, onde ingresou como novicio nos Padres Paúles. Na capital de España estudou Teoloxía e Historia, licenciándose en 1954. Foi director de colexios da Orde en Madrid e Baracaldo, así como profesor de Igrexa no teologado San Vicente de Paúl en Salamanca, do que foi reitor entre 1965 e 1973.
En 1973 trasladouse a Vigo, como mestre da Escola Universitaria de Maxisterio, iniciando un amplo labor como escritor e historiador. Foi un dos fundadores do semanario nacionalista “A Nosa Terra”, autor de diversas obras de ensaio e participou en numerosos traballos colectivos.
O acto cultural de Maceda será hoxe ás 11,45 horas na Cafetería Castillo, cunha concentración na cafetería do “Cesáreo”, histórico lugar de encontro de Francisco Carballo cos seus amigos de Maceda.
A continuación, ás 12,00 horas, na Praza Francisco Carballo, haberá unha vindicación do seu legado coa lectura dun singular texto da súa autoría. Intervirá na vindicación o investigador Santiago Prol.
Ás 12,30 horas, na Biblioteca Pública Francisco Carballo de Maceda, haberá unha colocación de cartaces no espazo dedicado á súa memoria. Contará coa intervención do ex alcalde de Maceda, Bieito Seara.
Na mesa redonda da Biblioteca Pública, intervirán o médico Luís Alfonso Vázquez, o teólogo Antón Gómez e o docente Xulio Gómez Rodríguez, baixo o título de “Compromiso e inculturación arredor de Francisco Carballo, aos nove anos do seu pasamento”.
Na presentación estará Celso Sánchez, tenente alcalde de Maceda, e o concelleiro de Cultura, Román Rodríguez González. O acto cultural terminará ás 14,00 cunha comida de confraternidade dos participantes.
https://www.laregion.es/articulo/allariz/francisco-carballo-tera-homenaxe-nun-acto-cultural-maceda/202312290034191263151.html
